Psalms 19
Anutuac marikibi
Yegecgareng yearu. Dawidingo yegec yofi heiec.
1Anutu ye kuc nga kibikperagiagoc, kurumenga kurumenga yeni siduc imoc dekperagikecdae nga sawango yeac marikibi deireckeude. 2Hadzing mongngo hadzing ogea yoac imoc edeu tofocnac mongngo tofocnac ogea imoc dedekperagi ammiude. 3Yeni yoacngina ning kpeu yoac mong mi dedae, fora. Ngic mongngo ubaudumengngina mi negenude. 4Nga ubaudumengngina imoc sifu bangectoa bangec, imohai kengkecde. Yeni yoacnginango bangec noboc noboc wisic wisickeau kendarude. Anutungo kurumenga kurumenga, imohai wenacac kporucbedzo mong faiu fede. 5Ye memeturang ngic mongngo memeturang ama manaunac ubangerecgoc maande, ifi isoc haude. Wenac ye nedzi nedzi ngic kuhagocngo firang anudeac sogac sogaigoc nedziande, ifi isoc hama 6kurumenga kurumenga tegia monnusing erema singa modacma kemebesonga tegia nobocsing kemeude. Ye gerea yombong anu wiac mongngo yearu naric mi sufuude.7KEBUAC dedeseri imoc gombunga amma ngicngac ubaonganina heigboriude. AmmaKEBUNGO yoac dekperagi nemmeude, imoc fora yombong amma ngic negen negentegecac obohoande, ye negen negentegec meficgemiude. 8KEBUAC dederecgeyoac imoc dindingac amma sogac sogai hereninau meficgenemmeude. AmmaKEBUAC nonoyoac imoc kongaha amma kicnina mekperagiude. 9KEBUAC eweheiheigoc kekec imoc kongaha amma feengkefude. NgaKEBUNGO dederecgeyoac modacnideac faiec, imoc seria amma dindingac. 10Imoc gol ferahama gol tegeng momoc ferahaude. Amma imoc kukundzau songea ferahama songea yombong ande. Imoc kukundzau kpedzucneandimbe, imoc ferahayombonggeude. 11Dederecgeyoacgango kingang ngicga goroya kpeu ye imoc modackefu, imocngo ubangerec wiac engena miude.
12Ngic yengenaocngoc isingemema kopocsiha naric mi hentegerude, kpac. Kebu, ge kopocsicna sufu sufuya wana. 13Ni, kingang ngicgango kopocsicfaka goa yofi negemma mekecbai, “Faka imoc songea andeac angkecbadenoc.” Ni ifi amba geng sinna hedzickena kopocsicngo mi garennubeso. Ge ifi anna ni kopocsic mong mi meficgebade nga singyoac kpema faka mangana mi ambade. 14Nga enacbibicnaunac yoac nga negen negeng herenau fede, imoc negenna ngereebeso.
OKEBU, gennoc neac hoc peperandzi seria nga ge bummenuma ebicfunac mesinunec.
Copyright information for
DED